Böyük Britaniyanın tanınmış musiqi və incəsənət nümayəndələri — Paul McCartney, Elton John, Dua Lipa, Kate Bush, Ian McKellen və Simon Rattle də daxil olmaqla 400-dən çox sənətçi — Baş nazir Keir Starmerə açıq məktubla müraciət edərək, süni intellektin müəllif hüquqları sahəsində yaratdığı təhlükələrə qarşı daha sərt tədbirlər tələb ediblər.
Məktubda sənətçilər, parlamentdə gələn həftə səsverməyə çıxarılacaq Sİ və məlumat qanunvericiliyi dəyişikliklərinin müəllif hüquqlarını illərlə sürən oğurluq təhlükəsi ilə üz-üzə qoyduğunu bildiriblər.
"Əsərlərimizi bir neçə xarici texnologiya nəhənginin maraqları naminə verməklə həm gələcək gəlirimizi, həm də böyük iqtisadi inkişaf fürsətini əldən verəcəyik," – sənətçilər vurğulayıblar.
House of Lords (Lordlar Palatası) bazar ertəsi məlumat qanununa əlavə edilmiş düzəlişə səs verəcək. Dəyişiklik təklifinə əsasən, süni intellekt şirkətləri müəllif hüququ ilə qorunan əsərləri istifadə etdikdə, müəllifləri məlumatlandırmaq məcburiyyətində qalacaqlar. Məktub müəllifləri bu dəyişikliklərin sənətçilərə və müəlliflərə AI şirkətlərinə qarşı hüquqi cavab tədbirləri görmək imkanı verəcəyini bildiriblər.
Hal-hazırda isə Böyük Britaniya hökuməti, müəlliflər "imtinadan" istifadə etmədiyi halda, AI şirkətlərinə müəllif hüququ ilə qorunan materiallar üzərində icazəsiz təlim keçməyə şərait yaradan planlar irəli sürüb.
Hökumət bu planlara qarşı narazılığı azaltmaq üçün iqtisadi təsir qiymətləndirməsi və şəffaflıq hesabatları vəd etsə də, sənətçilər bu güzəştləri yetərsiz hesab ediblər.
