2025-ci ilin ilk rübündə Azərbaycan iqtisadiyyatında əsas kapitala yönəldilən investisiyaların həcmi 3467,7 milyon manat təşkil edib ki, bu da ötən ilin eyni dövrü ilə müqayisədə 10,1 faiz azalma deməkdir.
Azalma həm neft-qaz, həm də qeyri-neft sektorlarında müşahidə olunub. Belə ki, neft-qaz sektoruna yatırılan investisiyalar 24,2 faiz, qeyri-neft sektoruna yönəldilən vəsait isə 2,4 faiz azalıb.
Bu dövrdə yatırımların:
- 52,3 faizi (1814,6 milyon manat) məhsul istehsalı sahələrinə,
- 28 faizi (970,2 milyon manat) xidmət sahələrinə,
- 19,7 faizi (682,9 milyon manat) isə yaşayış evlərinin tikintisinə sərf olunub.
Ümumilikdə daxili mənbələr hesabına yatırılan vəsaitlərin həcmi 2519 milyon manat olub ki, bu da ümumi investisiyaların 72,6 faizini təşkil edir. Əsas kapitala yönələn investisiyaların 77,7 faizi (2693,5 milyon manat) bilavasitə tikinti-quraşdırma işlərinə xərclənib.
Əsas kapitala yönələn investisiya nədir?
Əsas kapitala yönələn investisiya – ölkə iqtisadiyyatında uzunmüddətli istifadəyə hesablanmış əsas vəsaitlərin yaradılması və ya yenilənməsi üçün sərf olunan vəsaitlər deməkdir. Bu cür sərmayələrə zavod və fabriklərin tikintisi, infrastruktura yatırımlar, avadanlıq alınması, mövcud obyektlərin modernləşdirilməsi və yaşayış binalarının inşası daxildir.
Bu investisiyalar iqtisadiyyatın gələcək inkişafı, yeni iş yerlərinin yaradılması və ölkənin istehsal potensialının artırılması baxımından mühüm əhəmiyyət daşıyır.
Baxmayaraq ki, bu il azalma qeydə alınıb, daxili mənbələrin üstünlük təşkil etməsi, ölkə daxilində maliyyə resurslarının hələ də iqtisadi aktivliyə yönəldiyini göstərir.
Xəbərdəki məlumatlar Azərbaycan Respublikasının Dövlət Statistika Komitəsindən əldə edilib.
