Azərbaycan Mərkəzi Bankının 2024-cü il üzrə maliyyə hesabatına əsasən, ölkədə dövriyyədə olan kağız və metal pulların ümumi həcmi 31 dekabr 2024-cü il tarixinə 17 milyard 449 milyon 91 min manat təşkil edib. Bu göstərici ölkədə nağd pul dövriyyəsinin həcmi baxımından mühüm əhəmiyyət daşıyır və Mərkəzi Bank tərəfindən aparılan pul siyasətinin əsas indikatorlarından biridir.
Hesabatda qeyd olunur ki, dövriyyədə olan kağız və metal pulların tamlığının və düzgünlüyünün təmin edilməsi Bankın ciddi nəzarətində saxlanılır. Pul nişanlarının istehsalı, saxlanması və dövriyyədən çıxarılması üzrə bütün fiziki və inzibati nəzarət mexanizmləri bu məqsədə xidmət edir.
Yeni buraxılmış pul kütləsi 6,5 dəfə azalıb
Maraqlıdır ki, 2024-cü il ərzində Mərkəzi Bank cəmi 84,1 milyon manatlıq yeni kağız və metal pul nişanı çap şirkətlərindən təhvil alıb. Halbuki bu göstərici 2023-cü ildə 550,9 milyon manat təşkil etmişdi. Beləliklə, yeni buraxılmış nağd pul həcmi bir il ərzində təxminən 6,5 dəfə azalıb.
Bu azalma ekspertlər tərəfindən rəqəmsal ödənişlərin artması, elektron ticarətin genişlənməsi və mövcud pul nişanlarının dövriyyədə kifayət qədər qalması ilə izah olunur.
Dövriyyədə olan pulların tərkibi nədən ibarətdir?
Dövriyyədəki kağız və metal pullara aşağıdakılar daxildir:
- 2006-cı ildən dövriyyəyə buraxılmış yeni nümunəli Azərbaycan manatı (AZN),
- 1992-ci ildən dövriyyəyə buraxılıb sonradan tədavüldən çıxarılmış köhnə manatlar (AZM),
- eləcə də yubiley və xatirə pul nişanları.
Maliyyə hesabatına görə, bu pul nişanları yalnız nominal dəyərilə uçota alınır, Bankın anbarlarında saxlanılan, lakin hələ dövriyyəyə buraxılmamış pullar isə bu rəqəmlərə daxil edilmir.
