Qazaxıstanın eGov Mobile tətbiqində ev heyvanları üçün rəqəmsal pasportlar artıq əlçatandır. İstifadəçilər mobil tətbiqin "Rəqəmsal sənədlər" bölməsində pişik, it və digər ev heyvanlarının məlumatlarını görə bilərlər.
Bu pasportlar Heyvanların qeydiyyatı üçün vahid bazaya (TABAN) əsaslanır və heyvanın fərdi nömrəsi, adı, cinsi, rəngi, doğum tarixi, sahiblərinin məlumatları, həmçinin çipləmə, sterilizasiya və peyvənd tarixi kimi ətraflı məlumatları özündə əks etdirir.
Pasport sayəsində sahiblər baytarlıq klinikalarında, səyahət zamanı və heyvan sərgilərində lazımi məlumatları sürətli təqdim edə bilərlər. Bu sistem həm də sahibsiz heyvanların sayının azalmasına və sahiblərin məsuliyyətinin artmasına kömək edir.
Mart 2025-ci ilədək sistemdə 224 minə yaxın ev heyvanı qeydiyyatdan keçib, onların 20 mindən çoxu sahibsizdir.
Bundan başqa, eGov Mobile tətbiqində şəxsi məlumatların sızmasını yoxlamaq üçün Nomad Guard xidməti də mövcuddur. Eyni zamanda, sürücülük vəsiqəsinin onlayn yenilənməsi və tibbi arayışın əldə olunması kimi xidmətlər də tətbiqdə aktivdir.
