Qətər investisiya mühitini daha da canlandırmaq və iqtisadi diversifikasiyanı sürətləndirmək məqsədilə 1 milyard ABŞ dolları dəyərində yeni təşviq proqramı başladıb. Bu təşəbbüs "Invest Qatar" tərəfindən elan olunub və rəsmi təqdimat 5-ci Qətər İqtisadi Forumu çərçivəsində həyata keçirilib.
Yeni təşviq paketi həm yerli, həm də beynəlxalq investorlar üçün nəzərdə tutulub və 5 il ərzində yerli investisiya xərclərinin 40%-dək hissəsinin maliyyələşdirilməsini təmin edir. Buraya biznesin qurulması, ofis kirayələri, tikinti, avadanlıq və əməkdaşlarla bağlı xərclər daxildir.
Proqram Qətərin Üçüncü Milli İnkişaf Strategiyasında (NDS3) prioritet sayılan sahələri – qabaqcıl sənaye, logistika, informasiya texnologiyaları, rəqəmsal texnologiyalar və maliyyə xidmətlərini əhatə edir. İlk mərhələdə dörd istiqamətdə təşviq paketləri təqdim olunacaq:
- Qabaqcıl Sənaye Paketi – Əczaçılıq, kimya, avtomobil və elektronika kimi yüksək texnoloji sahələri əhatə edir.
- Logistika Paketi – Qətəri qlobal logistik mərkəzə çevirmək məqsədi daşıyır.
- Texnologiya Paketi – Süni intellekt, bulud texnologiyası və kibertəhlükəsizlik sahələrinə yatırımları təşviq edir.
- Lusail Maliyyə Xidmətləri Paketi – Lusail şəhərində maliyyə texnologiyaları, sərvət idarəçiliyi və sığorta xidmətlərinin inkişafına yönəlib.
Proqramdan yararlanmaq üçün minimum investisiya məbləği 5 il ərzində 25 milyon Qətər rialı (təxminən 6.8 milyon ABŞ dolları) təşkil etməlidir. Həmçinin, iş yerlərinin yaradılması və müvafiq sektorlarda təcrübə kimi meyarlar da tətbiq olunur. Müraciət prosesi Invest Qatar Gateway – ölkənin ilk rəqəmsal investor platforması vasitəsilə həyata keçiriləcək.
Qətər Ticarət və Sənaye naziri Şeyx Faysal bin Tani bin Faysal Al Tani bu proqramın ölkənin investisiya mühitini qlobal səviyyədə daha cəlbedici etməyə xidmət etdiyini vurğulayıb. Invest Qatar rəhbəri Şeyx Əli Əlvalid Əl Tani isə proqramın NDS3 hədəflərinə uyğun şəkildə iqtisadiyyatın dayanıqlı inkişafına töhfə verəcəyini bildirib.
2024-cü ildə Qətər 2.74 milyard dollar dəyərində xarici birbaşa investisiya (FDI) cəlb edib. 241 layihə çərçivəsində 9,348 yeni iş yeri yaradılıb. Qətər həmçinin IMD Dünya Rəqabətlilik İndeksində 11-ci yerə yüksəlib və Dünya Bankının Logistika Performansı İndeksində logistika və infrastruktur üzrə ilk 20-likdə yer alıb.
Yeni təşviq proqramı Qətərin milli iqtisadi prioritetləri ilə sıx əlaqələndirilərək ölkənin investorlar üçün daha cəlbedici məkana çevrilməsi yolunda mühüm addım sayılır.
